Të famshmit e këngës vdesin të rinj, duke arritur një mesatare të jetëgjatësisë prej 42 vjeç

Thënia e famshme “Jeto jetën dhe vdis i ri”, një nga parimet e rrymëës muzikore rock & roll duket se është zbatuar
fjalë për fjalë edhe nga shumë prej muzikantëve amerikanë dhe evropianë. Studimi, i publikuar në të specializuarën
“Journal of Epidemiology and Community Health”, nxjerr në pah një parashikim, sa të veçantë, aq edhe makabër: mundësitë që një popstar të vdesë pa mbushur 40 vjeç janë sa dyfishi i atyre të personave të tjerë. Studimi ka titullin kilometrik “Nga Elvis te Eminem: çmimi për të
qenë i famshëm - rreziku i vdekjes së parakohshme ndërmjet yjeve të rrokut dhe të popit në Evropë dhe në Shtetet e
Bashkuara”. Për këtë janë marrë në krahasim jetëshkrimet e një numri të madh këngëtarësh, duke marrë në konsideratë
si jetëgjatësinë e tyre, ashtu edhe mënyrën e të jetuarit. Sipas gazetës, Pit Doerti i “Babyshambles” pritet të ketë
edhe shtatë vjet jetë, ndërsa Eminem jo më shumë se tetë.
Studimi është bazuar te të dhënat e mbledhura nga jetëshkrimet e 1064 muzikantëve dhe këngëtarëve të rrymave
“rock”, “punk”, “rap”, “R&B”, “electronic” e “new age”, evropianë dhe amerikanë, që kanë arritur kulmin e suksesit
mes viteve 1956 dhe 1999. Mjekët kanë krahasuar vitet e jetës së tyre me ato të qytetarëve të zakonshëm të së njëjtës moshë, të të njëjtit seks dhe që jetojnë në
të njëjtin shtet. Mesazhi i studiuesve është i qartë: industria muzikore duhet të marrë seriozisht në konsideratë
mënyrën e sjelljes së muzikantëve të famshëm, edhe për efektin që ata mund të ushtrojnë mbi miliona tifozë, që mundohen t’i imitojnë deri në detaje.
Evropianët kanë statistika edhe më të këqija se amerikanët. Kështu, nëse një yll i muzikës në SHBA ka një mesatare
jetëgjatësie prej 42 vjeç, në Evropë ajo nuk i kapërcen 35 vjetët. Sipas studiuesve, rreziku më i madh për jetën e tyre
vjen nga 2-25 vjet, pasi ata kanë arritur suksesin. Më shumë se 100 prej tyre kanë vdekur, pikërisht nga abuzimet me alkoolin apo drogën. Më të famshmit janë Xhimi Hendriks, që vdiq 27 vjeç nga përzierja e stimulantëve me alkoolin, Elvis Presli, 42 vjeç, Xhim Morrison, 27 vjeç etj.
Por gjithçka varet prej tyre. Fakti që shumë të tjerë si Billi Idol, Pol Mekartni, Mik Xheker etj janë ende gjallë, tregon se çdo rregull ka edhe përjashtime.

Të Vdekurit nga Statistikat

Jimi Hendrix, 27 vjeç
Janis Joplin, 27 vjeç
Sid Vicious, 21 vjeç
Kurt Cobain, 27 vjeç
Phil Lynott, 36 vjeç
Jim Morrison, 27 vjeç
Keith Moon, 32 vjeç

Të mbijetuar nga Statistikat:

Billy Idol 55 vjeç
Tom Waits 58 vjeç
Ozzy Osbourne 59 vjeç
Iggy Pop 60 vjeç
David Bowie 60 vjeç
Mick Jagger 63 vjeç
Paul McCartney 65 vjeç